Bieito Ledo di que In Tempore Sueborum “crea algo máis de autoestima, de orgullo”

O presidente da Fundación Premios da Crítica visitou a mostra destacando que os galegos temos un pasado moi plural

OURENSE, 19 de abril de 2018.- O presidente da Fundación Premios da Crítica, fundador da editora Ir Indo e escritor ourensán Bieito Ledo Cabido, visitou hoxe In Tempore Sueborum. Este home, que foi crego nos seus tempos mozos, formado en Roma e en Madrid, vén desde Vigo a repousar no seu municipio natal de Xunqueira de Ambía, onde nestes días, como el di, escoitase cantar ao cuco. Ledo Cabido gozou cos contidos da mostra, e quedou abraiado co traballo que todo este proxecto científico e cultural agocha, ideado e estruturado polos comisarios Jorge López Quiroga e Artemio M. Tejera. Afirma Bieito que a exposición “é moi importante porque crea algo máis de autoestima, de orgullo. Nós fumos un territorio, un país, un colectivo cun gran complexo de inferioridade. Neste momento o ser galego, por múltiples circunstancias, é xa un orgullo pero inda falta unha fervedura para lograr, sen chegar á soberbia, si chegar á ter autoestima”. Por elo argumenta o visitante que “colaborar, axudar a descubrir de onde vimos, axuda a esa autoestima e a valorar o que somos e sobre todo para onde queremos ir, que son os tres grandes inquéritos que ten a filosofía”. Tres cuestións que, como sinala Bieito, non teñen fácil resposta.

Ledo Cabido non dubida en recomendar á sociedade que aproveite estas últimas semanas para achegarse a In Tempore Sueborum “para que vexan que nós temos un pasado moi plural, mou profundo e o que fai falta é valoralo para aportar ao mundo o que somos”.

Compartir enShare on FacebookShare on Google+Tweet about this on TwitterShare on LinkedIn

VOLVER